Lekhny post -08-Feb-2022
نجانے کون ستونِ وفا ہلانے لگا
میں پُل صراطِ محبت پہ ڈگمگانے لگا
جو سارے خواب پریشان ہو گئے میرے
پئے قرار ترے در سے لو لگانے لگا
خدایا!! کھول سبھی راز یا اٹھا لے مجھے
میں کائنات کے جھانسوں سے اُوب جانے لگا
یہیں سجا لے سوال و جواب کا میدان
نئے جہاں میں خدا کیوں ہمیں اٹھانے لگا
حسین پاک کا قصہ بیان کر، کہ مجھے
عدو کو سامنے دیکھا تو خوف آنے لگا
مآل کار مجھے حل یہی سجھائی دیا
اداس لوگوں کو درسِ فنا سنانے لگا
یہ کون ڈالنے آیا پرانے پھندے عقیل
یہ کون پچھلی گلی میں ہمیں بلانے لگا
احمد عقیل
